"өөрийгөө юунд буруутгаж зэмлэнэв? өрөөл, чамайг тэртэй тэргүй хэрэгтэй үед нь "авч хэлэлцэх" л юм чинь... яадын" гэж Аинштаин нэгэнтээ хэлснийг би нэгэнтээ олж уншиж, нэгэнтээ хаа нэгтээ бичиж билээ, дээр үед ээ, баргалжил өнгөрсөн зуунд. тэр үед “аааханнгг .. аааханннгг ..” гэсгээд мартсан.
харин Улаанбаатарт нэгэн эрхэмтэй уулзахад бас нэг иймэрхүү утгатай зүйл хэлсэн нь яг одоогийн надад асар олзуурхууштай байв. тэгээд олзолцон. тэгээд үе үе өөртөө сануулан хэлж, бүр өнөөх сэгсгэр Аинштаин хэлсийм чинь үнэний ортой хэмээн баталгаажуулж сууна. тэгээд... тэгсэн хэрнээ л өөрөө өөрийгөө авч хэлэлцэн, хэрэгт татаж, дуудан байцааж, буруутгаж, хэрэг хүлээлгэн, баривчилан саатуулж, хорьж, ял төлөвлөж, яллаж, шүүн тасалж, шийтгэж, ял эдлүүлж, хөдөлмөрөөр хүмүүжүүлсээр ... өөрөөс минь өөрийг минь өмөөрсөн хэн нэгэнд бүхнээ тавиад туучих шинжийн болж ирж байгааг яалтай. яах ч арга алга. шүүгчтэй л ярих хэрэгтэй. эсвэл сайн өмгөөлөгчтэй болж авах, түүнтэйгээ байнгын, харилцан ашигтай гэрээ байгуулах хэрэгтэй. үүний тулд түүнд төлбөр хийх чадалтай байх хэрэгтэй... хэрэгтэй.. хэрэгтэй... хэрэгтэн.
“эмэгтэй хүн ялдам зөөлөн байх тухай Хууль”, "чиклаадыг тохиромжтой хэмжээнд амтлах Үл стрээссдэгчидийн стандарт", “бүс үл зүүгч нь эрэгтэй хүнээс мангардуу байхыг зөвтгөх, хөхүйлэн дэмжих тухай бүх цаг үед бүх нийтээр мөрдөх Тогтоол”, “шулуухан хэлээд тавьчихийг үүрд хориглох Цаазын бичиг”, “урвагчийг уучилсныхаа хариуд хариу урвах Зарчим”, “өглөө эрт босох, шөнө эрт унтах тухай эрчим хүч хүрээгүй малчны амьдралыг сэргээх сургааль”, “үнэнч бус байхыг үнэлэх үй олны Завхайрлын алтан дүрэм”, “эмэгтэй хүн бие даан амьдрах чадлыг буруушаах бүх хүн төрөлхтний Хослон амьдрах үзэл баримтлал”, “дараагийн партнёр тодроогүй нөхцөлд хуучнаас харилцаагаа салгахыг үл хүлээн зөвшөөрөх Хамаарал харъяалал хараатын конвенц”, “хоол хийх, угаах, арчих, цэвэрлэх, халамжлах, тэвчих, гүрийх, дасах, орлого олох, үнэнч байх, нөхөн үржих, дур хүсэл хангах, даруухан байх зэрэг эм хүйстний үндсэн ба анхан шатны үүргийг хүлээн зөвшөөрөх тухай бултаар Бөмбөрцгийн хэлэлцээр”, “тал засч танилын хүрээг өргөжүүлэх блогчидийн зангараг”, “хариу нэхэхгүй хайрыг хамгийн чадварлагаар жүжиглэх Хувиа хичээгчдийн чин эрмэлзэл”, “нүүрнээ инээнгээ нууцаар гутгалах тухай 5N”.... гэх мэт гэх мэтийг ухамсартай болон ухамсаргүйгээр зөрчсөн, санаатай болон санамсаргүйгээр уландаа гишгэсэн, үйлдвэрийн болон тээвэрлэлтийн дамжлагаас олсон гэмтлийн улмаас үл хүндэлсэн... гэх мэт гэх мэт... гэмт хэрэг үйлдэж, ялд унаж, шийтгүүлж, засан хүмүүжигдэж байна даа. нэг захаас нь дурьдахад л ийм байна. нөгөө захаасаа бол бүрррр найгүй.
ай хөөрхий... гэмт хэрэгтэнд гишгэх газар үгүй. түүнд хааяа эргэлт оруулж хайрла, тэнгэр минь.