түнжин толгой нь хонгор хүрэн үстэй, өнгөтэй шил шигтгэчихсэн юм шиг нүд нь дандаа л сахилгагүйхэн гэрэлтэж, цоохор сэвхтэй хамар нь сарталзаад л ... заримдаа том хүн шиг под хийсэн юм хэлнэ. айхтар дүрсгүй биш мөртлөө нэлээн хөдөлгөөнтэй. гэхдээ хариугүйхэн. байрны атмаанд шоглуулчихаад нус нулимс болно. өнөөх эгч нь хар гүйхээрээ очиж өмөөрч хэрэлдэнэ. заримдаа гар зөрүүлэх ч энүүхэнд. эргэж ирээд дүүгийнхээ толгой руу хэд хэд байлгаад авна. дүүгээ өмөөрсөндөө, хэрэлдэж зүрх нь хөөрсөндөө, бас хүнд дээрэлхүүлсэнд нь бухимдсандаа жаахан цээжинд нь хор шар, уур хилэн...бас дүүгээ бодсон сэтгэл нь “холилдож” буцлан тэр гэхийн тэмдэггүй юм болж хувиран дотроос нь мэрсээр нүдэнд нь нулимс цийлэгнүүлж орхино. хэн нэгнийг өмөөрнө гэдэг, хэн нэгнийг хамгаалахын тулд өөрөөсөө хүчтэй нэгэнтэй хээв нэг тулах зориг гаргана гэдэг, хэн нэгний өмнөөс хор шар хөдлөх гэдэг сонин шаналантай мэдрэмжтэй тэгэхэд л анх танилцаж. дандаа муудалцана, боломж гарвал нь дээрэлхэнэ, болж өгвөл нь шоглоно, болохгүй юм хийгээд байвал нь цохиод авна, чихрээ харамлана, бохио нууна, өөрийнхөө өрөөндөө оруулахгүй гэж хаалгаа түгжинэ ... тэгсэн атлаа аав ээжээс бусад хүнээс учиргүй өмөөрнө. өмөөрөөд өөрөө өмрөх шахна.

харин сая өмөөрч чадсангүй ээ эгч нь. өмнөөс чинь уучлал гуйлаа, тэр бүсгүйгээс. өмөөрье гэхнээ үг гарсангүй. өөдөөс нь дэмий л .... уучлаарай ... л гэлээ.

насанд хүрсэн улс, хоорондоо учраа олно биз дээ, нарийн ширийнийг нь би яаж мэдэхэв. эгч нь мэдээд нэг тийш нь болгочихож болдоггүй, эр эм хоёрын хоорондохыг яалтай ч билээ. эгч нь байна би гээд өмөөрч зүрхэлсэнгүй, өмөөрье гэхнээ шалтаг олдсонгүй. эгч нь өөрөө эм хүн шүү дээ.

бүсгүйг чи гомдоожээ, залуу минь. эгчийгээ ичээлээ, бас гомдоолоо, дүү минь. гомдолдоо дийлдэж, хатуурхаад төрсөн өдрөөр чинь мэнд ч хүргэсэнгүй. чи ч ярьсангүй. бодвол айхгүй ч гэсэн аягүй байсан биз.

дүү минь намайг та гэж дуудаж байсан удаагүй, харин нэрний минь ард –ууш гэж залгаж “өхөөрддөгсөн”. тэгсэн хэрнээ хэрэг тарихаараа халгаж жийрхэн сүйд болно, би ч би, дуугаа хураан “шийтгэж” сүйд болно. ийм л сүйдтэй эгч дүү хоёр.

тэр бүсгүй зөвхөн эгчид чинь ховлож, чамайг. өөрийнхөө ээж, эгчдээ биш, найз олон хүүхнүүддээ биш. олон хүний амны зугаа болгохыг хүсээгүй байна. тэгж л дүүг минь хайрлаж. тэр хэмжээнд эгчид чинь бас итгэж.

би чамайг “аягүйрхүүлж” дуугаа хураах ч яамай, эгч дүү болж төрсөн хувь заяа байна, хаа холдов гэж. харин чи “миний дүү”-гийнхээ хувьд эр хүн шиг эр хүн байж, эгч болсон надаар дахин хүнээс уучлал бүү гуйлгаарай. өмөөрөх сэтгэл минь харин үхэн үхтэл унтрахгүй ээ, өөрийгөө өмөртөл чамайг өмөөрнө өө. эр бие өсөж хүний хань болсон ч, үр хүүхдээ тэвэрч айлын аав болсон ч, өтөл настайгаа золгож буурал өвгөн болсон ч чи миний жаахан дүү шүү дээ, түнжин толгой нь хонгор хүрэн үстэй, өнгөтэй шил шигтгэчихсэн мэт дүрсгүйхэн гялалзах нүдтэй ...

(отоото  -   эрэгтэй дүү)